NGCOBO – Ngaphandle kokubhiyozela iminyaka engamashumi amathathu wenkululeko eMzantsi Afrika, abaninzi basajamelene nengxaki yokungabinamanzi acocekileyo kwiphondo leMpuma Koloni ingakumbi eNgcobo.
UMasipala wesithili saseChris Hani ujongelwe phantsi emveni kokuba edyakraze isixa-mali esingapha kwe-R66 Million kwiiProjekthi ezisixhenxe zamanzi ezazityikitywe njengezigqityiweyo, kodwa azikasebenzi kunangoku.
Othethela uMasipala wesithili saseChris Hani uBulelwa Ganyaza uthe eziProjekthi zamanzi zisixhenxe zakhiwe kwiiwadi zaseNgcobo.
“Oku kubandakanya isigaba sokuqala seProjekthi yaseLokshin eyaqala ngonyaka ka-2015 yaza yagqitywa ngonyaka ka-2020. Isigaba sesibini bekufanele ukuba sagqitywa ngenyanga kaCanzibe 2021, kodwa sagqitywa kuphela ngeyoMsintsi 2023,” utyatyadule watsho.
Abahlali bathi amanzi awakaphumi kwiimpopo zengingqi zabo, nangona kuchithwe izigidi ngezigidi zemali. UMasipala unqwalile ukuba ngokwenene iProjekthi yaseSundwana yagqitywa ngenyanga kaTshazimpuzi 2022, onoKhontraka bathi bona igqitywe kulo umiyo nanjengoko kusafuneka kugqityezelwe pha naphaya.
Omnye wabahlali uGcinisizwe Mbeshu uthe, “UMasipala usixelela ukuba kuvavanyo lwamanzi ziye zavulwa iimpompo, kodwa akukho nalinye ilungu lelali eliwabonileyo amanzi ephuma. Kwiindawo ezithile kufakelwe kuphela impompo, kodwa iProjekthi ithathwa njengegqityiweyo.”
Kwiindawo ezininzi ephondweni ingxaki yamanzi iseyingxaki enkulu.
Ibhodi yamanzi i-Amatola ibhengeze izithembiso zokuyisombulula lengxaki kungentsuku zatywala.
Umfanekiso: Manqulo Nyakombi
Luxolo Buli & Elam Zintle Tsita
12 EyeNkanga 2024
Leave a Reply