XESI- Inkudla ephakamileyo nebichophe eBisho ibathe nka! ngesigwebo sobomi entolongweni abafunyenwe benamatyala okuphanga nokubulala umnikazi wevenkile nongummi waseTopiya(Ethiopia).
Esibini uSiyavuya Tisani (32) kunye noAphelele Ntsinga(28) bafunyenwe benamatyala aquka ukufunyanwa benomkhono wekati ongekhosemthethweni kunye neembumbulu kwakunye nokuphanga ngeenjongo zokubulala.
Lenkundla ibathe nka! ngesigwebo sobomi bethothoza kwezimnyama izisele, kwityala lokubulala kunye neminyaka elishumi elinesihlanu(15) ngokuphanga, iminyaka esibhozo(8) ngokufunyanwa neembumbulu kunye neminyaka emihlanu(5) ngokuphindwe kathathu ngokufunyanwa nompu ongekho mthethweni.
Ukanti ezizigwebo ngakwesibini kulindeleke ukuba ziqhube ngaxeshayne.
Ngokwengxelo etyekezwe ligunya-bantu lezotshutshiso ephondweni(NPA), “Ezizaphuli mthetho nebezisazana nomfi zangena kwivenkile yakhe ngelifuna ukukweleta icuba ngenyanga yoKwindla 2023, nalapho wabhebhethayo umfi baze baphuma kwivenkile yakhe iHeleluya eNjwaxa, eXesi.”
Ukongeza esisibini saphinda sabuyela kulevenkile ngesatya sikacwethe sanyanzelisa umfi ukuba makatyekeze yonke ethengayo kunye necuba. UNtsinga akazange alibazise nanjengoko wakhombisa umkhono wekati kumnini venkile, waze wonzakala umfi, wayokuyikhabela esibhedlele ibhekile.
Ezizigila-mkhuba zacela kwabanentsente nesixa-semali esingadizwanga, iibhokisi zamacuba kunye nomoya wexesha(airtime).
Othethela Igunya-bantu lezotshutshiso(NPA) ephondweni uLuxolo Tyali ugxininisile, “Umfi waswelekela kwisibhedlele iVictoria eDikeni, emveni kokuba kwabakho iinzame ukuba asinde koluhlaselo olwenzeka ngaphambi komncedisi walevenkile owayefunda kunye noTisani. Kusenjalo esibini sabonwa siphuma ngesantya kulevenkile kunye nezinto abazitabhela zona ngexesha lolulwaphulo mthetho.”
Kubungqina obubhetsiswe enkundleni uMmeli Nkulukeko Mzinyathi unqwalile ukuba esisibini sifanelwe ukuba siqamele ngenqindi unaphakade.
Ukongeza Umlawuli wegunya-bantu lezotshutshiso ephondweni uBarry Madolo usamkele esigwebo ngeliphakamisa ukubaluleka kobomi bomntu, kwaye igunya bantu lezotshutshiso (NPA) lizawuthi gqolo ukubonakalisa ukulwa nababulali.
Umfanekiso: uthunyelwe
Wonga Sirayi
