MTHATHA- Xakusithiwa vuk’uzenzele noko akuxelwa lena, oku kuza emveni kokuba kunqakulwe indoda ebizenza ugqirha nebinxibe idyasi emhlophe nobuxhakaxhaka bogqirha kwisibedlele iNelson Mandela Academic eMthatha ngomhla weshumi kule imiyo.
Iingxelo zitweze ngelithi izinto zijike zamuncu xa omnye womongikazi ethe wabethwa zinkumbulo zobuso balendoda, eyabhaqwa itshitshiliza kumakhasi onxibelelwano izenza umfundisi-ntsapho ngaphambili. Lomongikazi khange aphozise maseko uhlebele oonogada ukuba kunqakulwe lendoda, kungekonakali.
Iingxelo zikwabhentsise ukuba lendoda ayizange igqibe nebanga leshumi(Matriki), ngelixa iphekhwa isophulwa ngemibuzo lendoda izithethelele ngelithi ibizokwenza uphando olunzulu(research) elisezingeni leengcaphephe zompondo-zihlanjiwe bogqirha.
Ukungeza othethela iSebe lezeMpilo ephondweni uSiyanda Manana uthethe wenjenje, “Lendoda ibonwe iquqa iiwadi ezahlukeneyo, kwesisibhedlele ukanti siliSebe sibulela nendlela abasebenzi abenze ngayo ukuqinisekisa ukuba izigulane zisindile kulomkhwa”.
LokaManana ukwanabe ngelithi, “Sityumbe negqiza elizoncedisana namapolisa ukuze kufunyanwe usapho lalendoda, nayo ikhe ifumana uhlolo lengqondo”.
Ukuzothi ga ngoku lendoda ithathwe ngamapolisa ahamba nayo kwaye ngokwe nceba lendoda akange iphathe nesinye isigulane.
Umfanekiso: uthunyelwe/Facebook
Luxolo Buli
11 Tshazimpuzi 2025
