KARIEGA- Ityiwa ingene enxebeni nzulu kwiintsapho ezingamakhulu alithoba(900), oku kuza emveni kwesithonga sokuvalwa ngokusesikweni inkampani yamavili iGoodyear, eKariega ngomhla we-15 kule imiyo.
Nanjengoko eli loMzantsi Afrika liye lithwaxwa kanobomu yintswela-ngqesho, lenkampani yakwaGoodyear ivakalise isigqibo sokuvala kwiinyanga ezimbini ezidlulileyo.
Ukongeza lenkampani isithatha esisigqibo emveni kweminyaka eyi-78, igxotha ikati eziko kwiintsapho eziniintsi ephondweni. Oyena mceli-mngeni wokuvalwa kwalenkampani uza emveni kokuba lenkampani ithe yavakalisa izicwangciso zokufudukela phesheya kwamazwe.
Abasebenzi kuquka nemibutho yabasebenzi abazithathanga bengqenge ngecala ezizigqibo,unobhala jikelele wombutho wabasebenzi abasebenza ngentsimbi(NUMSA) uIrvin Jim uphefumle ngelithi, ” Sisafakana imilomo nabaqeshi ukuzama ukusombulula lengxaki sikuyo, kwaye likhona ithemba lokuba singavana.”
Omnye wabasebenzi noxheleke emphefumlweni yilemeko utyatyadule wenjenje, “Iinyembezi bezizehlela ekuseni wabe unkosikazi esithi kuzolunga tata kuba lendawo ibiseyifana nekhaya kum. Abanye bethu bajamelene namatyala ezindlu izithuthi nanjengoko bebesandokuzifaka ematyaleni ngethemba lokuba nomsebenzi osisigxina.”
Luxolo Buli
16 EyeThupha 2025
