GATYANA- Kwiinzame zokuxhasa kunye nokukhuthaza amashishini asakhasayo ungenelele ngokumandla umasipala wasekuhlaleni waseMbhashe, ukuncedisa isikhululo sika nomathotholo esisakhasayo iMbhashe FM, ngokusibonelela ngezixhobo zokusebenza, ezixabisa ngapha kwe R240 000,00, ngomhla we22 kuCanzibe 2025.
Esikhululo nebesikade sitsala nzima ekusasazeni kumazwe omoya, nesigxumeke iintente eNqabarha A/A kwilali yaseMtokwane kuGatyana.
Sifumene inkxaso engummangaliso kulomasipala nanjengoko besitsala nzima kwezezimali, izixhobo zokusebenza kunye nokuqhuba ushishino ngendlela.
Ukongeza esisikhululo iMbhashe FM nesasazela emaphandleni kwilali yaseMtokwane eNqabara A/A.
Usodolophu womasipala waseMbhashe uCeba Samkelo Janda unikezele ngokusesikweni ngendlela zokuncedisana neliziko lezosasazo, watsho esithi bengumasipala bagqibe kwelokuba bazise uncedo obeludingeka kwesisikhululo.
Ethetha eholweni eMtokwane uJanda utyatyadule wenjenje, “Olungenelelo lukarhulumente lizakuncedisa ngokumandla kwesikhululo ukuhlangabezana nemingeni yaso, lukwancedisa ukuba kusasazwe, kuziswe neenkonzo zosasazo ezingundoqo”, utshilo uJanda.
Usodolophu uqhube ngelithi ubunye kunye nobambiswano luzoncedisa ekutheni esikhululo sikwazi ukujamelana neengxaki zaso, kwaye wonke umntu azidle ngaso. “Ngoku okuseleyo kukuba singumasipala noluntu ngokubanzi sixhase isikhululo iMbhashe FM”, wongeze watsho uSodolophu.
Phakathi kwezinto ekuxhaswe ngazo esikhululo ngumasipala, zizixhobo zobuxhakaxhaka balemihla eziquka iCentral Processing Unit(CPU), ikhompyutha, izitulo, iidesika, iilaptops, iprinta, irutha yeWiFi kunye nezinye ezincedisa ukuze kusebenze ngendlela usasazo lukanomathotholo.
Kulindeleke ukuba ezizixhobo zincedise ngakumbi ekuphuculeni indlela yokusebenza, kukhuthazwe nabasebenzi ekuziseni indaba ezisulungekileyo. Kukwalindeleke ukuba kufumaneke nabasasazi abakumgangatho nabaqeqeshekileyo ngokobuxhakaxhaka balemihla, ukuze umphulaphuli afumane usasazo olungcono.
Esisikhululo siwela umlambo ugcwele nanjengoko sityatyadula kuGatyane, Dutywa uyokuqhina eXhorha.
Umfanekiso: Mbhashe Local Municipality/Uthunyelwe
Wonga Sirayi
26 Canzibe 2025
